ငါ့ကြောင်ကလေးကို မျက်စိမှိတ်ပြသွားသူ


ငါ့ကြောင်ကလေးကို မျက်စိမှိတ် ပြသွားသူ

အဲဒီအထင်ကရနေရာလေးမှာ
ငါ့ကြောင်ကလေး တငြိမ့်ငြိမ့်နဲ့ ပုခက်လွှဲနေတာ…
ဘာကို ကိုက်ဖဲ့စားသောက်ရမယ်ဆိုတာ ငါ့ကြောင်ကလေး သိရှာ မထင်ဘူး…
အလှမွေးကန်ထဲက ငါးကလေးက မျက်စိမှတ်ပြသွားတော့
ပါးလွှားတဲ့ ကြားခံတခုခုကိုပဲ ငါ့ကြောင်ကလေး ကုတ်ခြစ်ချွေးသိပ်နေခဲ့သလား…..

သူ့ကြောင့်သာ မဟုတ်ရင် ဒီကိစ္စကို ဘယ်သူသိမှာ မှတ်လို့ လို့….
ဘာသာစကားက ထ ထအော်တော့..
လောကအဝန်း ရယ်သွမ်းသွေးသံ ဆူညံပွထလို့…
LP ကဗျာဆရာဟာ ဘာသာစကား အမိုက်မှောက်မှာ ချောင်ပိတ်မိလို့….
အတ္တအစိမ်းလိုက်ကို ဖြည်းဖြည်းချင်း လိုက်သိမ်းနေရတယ်….

ငါ့ကြောင်ကလေးဟာ ငါးကြော်ကြိုက်ပေမယ့်…
ကြွက်တွေဟာလည်း သူ့အတွက်ဆိုတာ သိခဲ့တာ…
ငါ့ကြောင်ကလေးက ကွန်ဆာဗေးတစ်…
ငါးကြော်ဆို တမျှင်ချင်း စားတယ်…
ကြွက်ခုတ်ရမယ့် သမိုင်းပေးတာဝန်ဆိုတာ စိတ်ဝင်စားတာ မဟုတ်ဘူး…
သူ့ကိုယ် သူ လျှာနဲ့ ပွတ်သပ်ပြီး
သူ့ကြောင်မလေးအကြောင်းစဉ်းစားချင် စဉ်းစားနေတော့တာ…
လောကအဝန်းက ပြဿနာပေါင်း သောင်းခြောက်ထောင်ကို
ငါ့ကြောင်ကလေး မျက်စိဒေါက်ထောက် ကြည့်မိတဲ့ နေ့မှာ
သူဟာ သေကွဲ ရှင်ကွဲ အကြောင်းကို ဘယ်တော့မှ ပြောမဆုံးဘူး..

တနေ့မှာ သူဟာ သူ့ဆီကို
အဟောင်းအမြင်း အရိအရွဲကြီး လာရောက် ကပ်ငြိမှာကို တိတ်ဆိတ်စွာ မျှော်လင့်လို့…
ကြောင်အိုပေးမှေး ကိုက်ပါနဲ့လေး ဆိုတာကြီး ခံတွင်းတွေ့နေဆဲ….
ငါ့ကြောင်ကလေးဟာ သူနဲ့ သဟဇာတကို အမြဲ ရှာနေပေမယ့်
သူ့ရဲ့ အတိဇာတကို မေ့လျော့ပစ်ချင်တာ မဟုတ်ဘူး…
ကြွက်ထောင်ချောက်လေးနားမှာ ခြေဆင်းပြီး စောင့်နေဆဲ….

ငါ့ကြောင်ကလေးကို နားလည်တာ ဆိုလို့
သူ့ကို ရေးတဲ့ ကဗျာဆရာရယ် …
ကြွက်ထောင်ချောက်ပေါ်က အသားတစ်ကလေးရယ်ပဲ ရှိခဲ့တာ….
ဘာမှန်းမသိ…ငါ့ကြောင်ကလေး သမ်းဝေလိုက်တာနဲ့
ကဗျာဆရာဟာ သာမန်နှာစေး ချောင်းဆိုနဲ့ တင် … နမိုးနီးယား ဝင်တော့တာပဲ…
ကြွက်တွေ ထောင်ချောက်ကို မတိုးတာလည်း…တော်တော် ခက်တယ်….
အဲဒီလိုပဲ….ဘာမဟုတ်တဲ့ အကြောင်းအရာတိုင်းလည်း…
ငါ့ကြောင်ကလေးဟာ အမြဲတမ်း သမ်းဝေနေတော့တာပဲ…….

တေဇာအောင်(Nov 26,2009)

Popular posts from this blog

ပိုမိုညံ့ဖျင်းသော စိတ်ကူးထည်တို့ဖြင့် ဆက်လက်ရှင်သန်နေနိုင်ရန် အားထုတ်မှု (မြင့်သန်း)

အိပ်ဆေး သောက်၍ အိပ်မပျော်နိုင်သော ရောင်စုံညများ

ဝတ္ထုတို မတိုရသည့် အကြောင်း (မြင့်သန်း)